न्युजिल्यान्डको तटमा ५० वटा ह्वेल माछा अलपत्र, केहीकाे मृत्यु

भाकल, विश्वास र भक्तिको संगम बन्दै मोरङको पाथीभरा मन्दिर (फोटो फिचर)

तेजन खड्का/न्युज कारखाना मोरङ, १९ कात्तिक । मनमा अनेकौँ कामना, हृदयमा अटुट विश्वास र ओठमा माताको नाम। यही श्रद्धा र भक्तिभाव बोकेर पुग्ने भक्तजनको चहलपहलले पछिल्लो समय मोरङको सुन्दरहरैँचा नगरपालिका–स्थित सलकपुर चन्द्रनगरमा रहेको पाथीभरा माताको मन्दिर धार्मिक आस्थाको महत्त्वपूर्ण केन्द्रका रूपमा परिचित हुँदै गएको छ। धार्मिक विश्वास, आध्यात्मिक शान्ति र प्राकृतिक सौन्दर्यको संयोजन रहेको यस मन्दिरमा दिनहुँ विभिन्न स्थानबाट भक्तजन दर्शन तथा पूजाआजाका लागि पुग्ने गरेका छन्। स्थानीयस्तरमा सुरु भएको धार्मिक आस्थाले विस्तारै गाउँ–ठाउँको सीमा पार गर्दै जिल्ला, देश र विदेशसम्मका भक्तजनलाई आकर्षित गर्न थालेको छ। माताप्रतिको अगाध श्रद्धा र विश्वासले यस मन्दिरलाई धार्मिक गन्तव्यका रूपमा स्थापित गराउँदै लगेको छ। पाथीभरा माताको नामसँग जोडिएका अनेकौँ धार्मिक विश्वास र जनआस्थाले यहाँ आउने भक्तजनको मनमा छुट्टै स्थान बनाएको छ। कसैले जीवनमा आइपरेका समस्या समाधान हुने विश्वास बोकेर माताको दर्शन गर्छन् त कसैले परिवारको सुख, शान्ति, समृद्धि र सुस्वास्थ्यको कामना गर्छन्। कतिपयले आफ्नो सन्तानको उज्ज्वल भविष्य, रोजगारी, व्यवसायमा सफलता तथा जीवनका महत्त्वपूर्ण कामना पूरा होऊन् भन्दै भाकल गर्ने गरेका छन्। भक्तजनका लागि मन्दिर केवल धार्मिक विधि पूरा गर्ने स्थान मात्र होइन, मनमा रहेका पीडा, चिन्ता र निराशा बिसाउने विश्वासको थलो पनि हो। दैनिक जीवनका अनेकौँ उतारचढावबीच मानिसलाई मानसिक शान्ति, आत्मबल र आशा प्रदान गर्ने धार्मिक स्थलका रूपमा यसको महत्त्व बढ्दै गएको देखिन्छ। भाकलदेखि कृतज्ञतासम्मको आस्था मन्दिरमा पुग्ने भक्तजनका आस्थाका कथा फरक–फरक छन्। कसैले पहिलोपटक माताको दर्शन गर्न आउने इच्छा पूरा भएको खुसी साट्छन् भने कसैले वर्षौँदेखि गर्दै आएको भाकल पूरा भएको विश्वाससहित पुनः मन्दिर पुगेर पूजा अर्चना गर्छन्। कसैले आफ्नो परिवारको सुखद भविष्यको कामना गर्छन् त कसैले जीवनमा आइपरेका कठिनाइबाट मुक्ति मिलोस् भन्दै प्रार्थना गर्छन्। धार्मिक आस्थामा विश्वास गर्नेहरूका लागि भाकल केवल कुनै इच्छा पूरा गराउने कामना मात्र होइन, आफ्नो विश्वास र समर्पण व्यक्त गर्ने माध्यम पनि हो। मनोकामना पूरा भएको अनुभूतिपछि पुनः मन्दिर पुगेर धन्यवाद व्यक्त गर्ने परम्पराले यहाँको धार्मिक वातावरणलाई थप जीवन्त बनाएको छ। मन्दिर परिसरमा देखिने भक्तजनका गतिविधिले पनि यहाँको धार्मिक महत्त्व झल्काउँछन्। हातमा पूजाका सामग्री बोकेर आउने, माताको दर्शन गर्ने, दीप प्रज्वलन गर्ने र श्रद्धापूर्वक शिर झुकाउने दृश्यले मन्दिर परिसरलाई भक्तिमय बनाउँछ। कसैका आँखामा खुसी देखिन्छ त कसैका अनुहारमा प्रार्थना पूरा हुने आशा। यस्ता दृश्यले मानिसको जीवनमा आस्था र विश्वासले राख्ने स्थानलाई सहजै अनुभूत गराउँछन्। सहज पहुँचले थपिँदै भक्तजनको आकर्षण धार्मिक महत्त्वसँगै यस मन्दिरको अर्को उल्लेखनीय पक्ष यसको सहज पहुँच हो। पूर्व–पश्चिम लोकमार्गको नजिकै रहेको मन्दिरमा पुग्न टाढाबाट आउने भक्तजनलाई समेत सहज छ। लामो दूरी हिँड्नुपर्ने वा कठिन बाटो पार गर्नुपर्ने अवस्था नहुँदा बालबालिका, ज्येष्ठ नागरिक तथा शारीरिक रूपमा हिँडडुल गर्न कठिनाइ हुने व्यक्तिहरूका लागि पनि दर्शन गर्न अनुकूल वातावरण रहेको छ। स्थानीय सञ्चारमाध्यम ‘सुन्दरहरैँचा अपडेट’का सञ्चालक तथा पत्रकार शिव भट्टराई ‘भोजपुरे’का अनुसार लोकमार्गको नजिकै मन्दिर रहेकाले विभिन्न स्थानबाट आउने भक्तजनलाई दर्शन गर्न सहज भएको छ। उनका अनुसार विशेषगरी ज्येष्ठ नागरिक, अशक्त तथा शारीरिक रूपमा असहज अवस्था भएका व्यक्तिहरूले समेत सहज रूपमा मन्दिरसम्म पुगेर माताको दर्शन गर्न पाउनु यसको महत्त्वपूर्ण विशेषता हो। धार्मिक स्थलसम्म पुग्न सहज हुनु पनि भक्तजनको आकर्षण बढाउने एउटा आधार बनेको उनको भनाइ छ। धार्मिक स्थलको विकास र विस्तारका लागि धार्मिक महत्त्वसँगै भौतिक पहुँचको पनि उत्तिकै भूमिका हुन्छ। यस दृष्टिले सलकपुरको पाथीभरा मन्दिरले सहज पहुँचको सुविधा पाउनु सकारात्मक पक्ष हो। यातायातको सहजताले टाढाका भक्तजनलाई समेत मन्दिरसम्म पुग्न प्रेरित गरेको छ। धार्मिक पर्यटनको सम्भावना बोकेको स्थल सलकपुरको पाथीभरा मन्दिर धार्मिक आस्थाको केन्द्रका रूपमा मात्रै नभई स्थानीय पर्यटनको सम्भावना बोकेको स्थलका रूपमा समेत परिचित हुँदै गएको छ। प्रकृतिको सुन्दरता, शान्त वातावरण र धार्मिक महिमाको संयोजनले यस क्षेत्रलाई थप आकर्षक बनाएको छ। धार्मिक पर्यटनको विकासले कुनै क्षेत्रको पहिचान विस्तार गर्न मात्र होइन, स्थानीय आर्थिक गतिविधिलाई समेत चलायमान बनाउन सहयोग पुर्‍याउन सक्छ। मन्दिरमा भक्तजनको आवागमन बढ्दै जाँदा आसपासका क्षेत्रमा साना व्यवसाय, स्थानीय उत्पादनको प्रवर्द्धन तथा सेवा सुविधाको विस्तार हुने सम्भावना रहन्छ। यसका लागि मन्दिर परिसरको सरसफाइ, व्यवस्थित पूजाआजा, आवश्यक पूर्वाधारको विकास, खानेपानी, विश्रामस्थल, शौचालय तथा सूचना व्यवस्थापनमा ध्यान दिन सके धार्मिक पर्यटकका लागि थप सहज वातावरण निर्माण हुन सक्छ। मन्दिरको मौलिक धार्मिक तथा सांस्कृतिक महत्त्व जोगाउँदै व्यवस्थित रूपमा विकास गर्न सके यसले सलकपुरको पहिचानलाई अझ फराकिलो बनाउन मद्दत पुग्नेछ। धार्मिक तथा सांस्कृतिक सम्पदाको संरक्षण स्थानीय समुदायको साझा जिम्मेवारी पनि हो। मन्दिरसँग जोडिएका परम्परा, जनविश्वास र धार्मिक गतिविधिको संरक्षण गर्दै नयाँ पुस्तालाई समेत यस क्षेत्रको महत्त्वबारे जानकारी गराउन सके यसको पहिचान दीर्घकालसम्म कायम राख्न सकिन्छ। एउटै आस्थाले जोडिएका अनेकौँ मन मानिसको विश्वास व्यक्त गर्ने तरिका फरक हुन सक्छ। कसैले मौन प्रार्थना गर्छन्, कसैले दीप बाल्छन्, कसैले फूल चढाउँछन् त कसैले मनोकामना पूरा भएपछि पुनः माताको दर्शन गर्न पुग्छन्। तर सबैको भावनाको केन्द्रमा एउटै कुरा हुन्छ-आस्था, विश्वास र समर्पण। सलकपुरको पाथीभरा मन्दिरमा देखिने भक्तजनको चहलपहलले यही भावनालाई उजागर गर्छ। यहाँ पुग्ने हरेक व्यक्तिका आ–आफ्नै कथा, चाहना र अनुभूति छन्। कसैका लागि यो मनोकामना पूरा हुने विश्वासको केन्द्र हो, कसैका लागि पारिवारिक सुख र समृद्धिको कामना गर्ने स्थल त कसैका लागि केही समय शान्त वातावरणमा बिताएर आत्मिक सन्तुष्टि प्राप्त गर्ने ठाउँ। धार्मिक विश्वास मानिसको व्यक्तिगत अनुभूति र आस्थासँग जोडिएको विषय हो। त्यसैले यहाँ आउने प्रत्येक भक्तजनले मन्दिरलाई आफ्नै भावनाअनुसार अनुभूत गर्छन्। कसैले माताको दर्शनबाट आत्मविश्वास प्राप्त गर्छन् त कसैले आफ्नो दुःख–पीडा बिर्सेर नयाँ आशासहित फर्किन्छन्। समयसँगै सलकपुरको पाथीभरा मन्दिरप्रतिको आकर्षण विस्तार हुँदै जानु यस क्षेत्रको धार्मिक पहिचानका लागि सकारात्मक संकेत हो। सहज पहुँच, भक्तजनको बढ्दो आवागमन र स्थानीय समुदायको अपनत्वले यसको महत्त्व थप उजागर गरिरहेको छ। भाकल गर्नेहरूका लागि आशाको केन्द्र, भक्तजनका लागि श्रद्धाको स्थल र स्थानीय क्षेत्रका लागि धार्मिक पहिचान बनेको सलकपुरको पाथीभरा मन्दिरले आस्था र विश्वासको साझा सन्देश दिइरहेको छ। यहाँ पुग्ने भक्तजनका हातमा पूजा सामग्री, मनमा अनेकौँ कामना र हृदयमा माताप्रतिको अगाध श्रद्धा देखिन्छ। यही श्रद्धा, विश्वास र भक्तिको निरन्तरताले सलकपुरको पाथीभरा मन्दिरलाई धार्मिक आस्थाको आकर्षक गन्तव्यका रूपमा स्थापित गराउँदै लगेको छ। तस्बिरहरुः सुजन दाहाल

जनकपुरधाम-अयोध्या रेल सञ्चालनको तयारी तीव्र, भोलि निरीक्षण

सुभाष कायस्थ/न्युज कारखाना जनकपुरधाम, १८ असोज । नेपालको जनकपुरधामदेखि भारतको अयोध्यानसम्म सञ्चालन हुने भनिएको आयोजना अन्तर्गत रेल सञ्चालनको तयारी तीव्र पारिएको छ । प्रस्तावित जनकपुरधाम-अयोध्याधाम रेल सेवा सञ्चालन गर्नुअघि सुरक्षा तथा प्राविधिक अवस्थाको निरीक्षण गर्न भारतीय रेलवेका अधिकारीहरू बिहीबार रेलसहित जनकपुरधाम आउने भएका छन् । भारतीय रेलवेका अधिकारीहरूको टोलीले नेपाल रेलवे अन्तर्गतको प्रमुख जक्सन कुर्थासम्म पुगेर रेल सञ्चालनका लागि आवश्यक पूर्वाधार, सुरक्षा व्यवस्था र अन्य प्राविधिक पक्षको स्थलगत निरीक्षण गर्ने बताइएको छ। यस क्रममा नेपाली रेलवेका अधिकारीहरूसँग रेल सञ्चालनको व्यवस्थापन र सुरक्षाबारे समेत छलफल हुने जनाइएको छ ।  प्रस्तावित रेल सेवा सञ्चालनमा आएपछि जनकपुरधामबाट भारतको अयोध्याधामसम्म करिब ४६४ किलोमिटरको यात्रा रेलमार्फत गर्न सकिनेछ। प्रारम्भिक योजनाअनुसार जनकपुरधामबाट प्रस्थान गर्ने रेल अर्को दिन बिहान अयोध्या पुग्नेछ । रेल सेवाको औपचारिक समयतालिका, टिकट दर र साप्ताहिक सञ्चालन दिनबारे अन्तिम निर्णय हुन बाँकी रहे पनि प्रारम्भिक तयारीअनुसार सातामा एक दिन शनिबार रेल सञ्चालन गर्ने योजना रहेको रेलवे अधिकारीहरूले बताएका छन् ।  प्रस्तावित रुटअनुसार रेल जयनगरबाट मधुवनी, दरभंगा, सीतामढी हुँदै गोरख भएर अयोध्या पुग्नेछ। शनिबार मध्यान्ह जनकपुरधामबाट छुट्ने रेल आइतबार बिहान अयोध्याधाम पुग्ने गरी सञ्चालनको प्रारम्भिक खाका तयार गरिएको छ । रेल सेवाको सुरक्षालाई लिएर नेपाल र भारतबीच जिम्मेवारीसमेत छुट्याइएको बताइएको छ। जयनगरदेखि जनकपुरधामसम्मको नेपाली रेलमार्गको सुरक्षा नेपाल रेलवेले गर्नेछ भने जयनगरदेखि भारतीय भूभागमा पर्ने रेलमार्गको सुरक्षा भारतीय रेलवेले गर्नेछ । यसैबीच, नेपालका प्रधानमन्त्री बालेन्द्र शाह (बालेन) र भारतीय प्रधानमन्त्री नरेन्द्र मोदीले संयुक्त रूपमा जनकपुरधाम–अयोध्याधाम रेल सेवाको उद्घाटन गर्ने तयारी छ । उद्घाटन भारतको राजधानी नयाँदिल्लीबाट गर्ने कार्यक्रम रहेको अधिकारीहरूको भनाइ छ । नेपाल भ्रमणमा रहेका भारतीय विदेश सचिवको उपस्थितिमा नेपालका परराष्ट्र सचिव तथा अन्य अधिकारीहरूसँग हुने कूटनीतिक छलफलमा समेत प्रस्तावित रेल सेवाको विषयले प्राथमिकता पाउने अपेक्षा गरिएको छ । रेलमा यात्रुहरूको सुविधालाई ध्यानमा राख्दै एसी, स्लिपर र जनरल गरी तीन प्रकारका कोच रहने बताइएको छ। यसले धार्मिक यात्राका लागि अयोध्या जाने नेपाली तथा जनकपुरधाम आउने भारतीय पर्यटकलाई सहज आवागमनको अवसर प्रदान गर्ने अपेक्षा गरिएको छ । यसअघि पनि जनकपुरधाम र अयोध्याबीच धार्मिक तथा सांस्कृतिक सम्बन्धलाई थप मजबुत बनाउने उद्देश्यले नेपालका तत्कालीन प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीले संयुक्त रूपमा बस सेवाको शुभारम्भ गरेका थिए। तर, उक्त बस सेवा नियमित हुन नसकी एक वर्ष पनि टिक्न सकेको थिएन । जनकपुरधाम माता जानकीको जन्मभूमि र अयोध्या भगवान् रामको जन्मभूमिका रूपमा परिचित रहेका यी दुई धार्मिक नगरीबीच प्रत्यक्ष रेल सम्पर्क स्थापित भएमा धार्मिक पर्यटन, तीर्थयात्रा, व्यापार तथा सांस्कृतिक आदानप्रदानमा नयाँ सम्भावना खुल्ने विश्वास गरिएको छ । हप्तामा एक एक पटक सो रेल सेवा सञ्चालन हुने जनाइएको छ । प्राप्त जानकारी अनुसार जकपुरधामबाट शनिवार र अयोध्याबाट सोमवार सो रेल सेवा सञ्चालन हुने बुझिएको छ ।   

अचानक बढेको चिसो र पहिरोको उच्च जोखिम हुने

काठमाडौं, कार्तिक १३ । बङ्गालको खाडीमा विकसित चक्रवात “अर्नब” को अवशेष तथा पश्चिमी वायुको संयुक्त प्रभावका कारण आगामी कार्तिक १४ गते (शनिबार) सम्म देशका अधिकांश स्थानमा मौसम बदली रही मेघगर्जन र चट्याङ्गसहित मध्यम वर्षा तथा हिमपातको सम्भावना रहेको छ।   मौसम पूर्वानुमान महाशाखाका अनुसार यस प्रणालीको प्रभाव अपराह्नदेखि भने क्रमिक रूपमा कम हुँदै जानेछ।   भारी वर्षा र हिमपात: कोशी, मधेश, बागमती र गण्डकी प्रदेशका थोरै स्थानहरूमा भारी वर्षा तथा एक–दुई स्थानमा धेरै भारी वर्षा र हिमपातको सम्भावना रहेको छ। त्यसैगरी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भू–भागका थोरै स्थानमा पनि भारी वर्षा र हिमपात हुन सक्नेछ।   कृषि तथा बाली संरक्षण: पाकेको धानबाली भित्र्याउने लगायतका महत्वपूर्ण कृषि कार्यहरू वर्षा सुरु हुनुअघि नै सम्पन्न गर्न कृषकहरूलाई अनुरोध गरिएको छ।   पर्वतारोहण तथा पर्यटन क्षेत्र: उच्च पहाडी तथा हिमाली क्षेत्रहरूमा भारी हिमपात, हिमआँधी (ब्लिजार्ड) तथा हिमपहिरोको उच्च जोखिम रहेको छ। तसर्थ, अर्को सूचना नभएसम्म पर्यटकहरूलाई उच्च हिमाली भू–भागमा नजान र यदि गएका भए सुरक्षित स्थानमा रहन सचेत गराइएको छ।   दैनिक जनजीवन र यातायातमा प्रभावः अचानक बढेको चिसोपनका साथै जोखिमयुक्त स्थान तथा सडक छेउछाउ पहिरो जाने सम्भावना रहेको छ। यसले सडक तथा हवाई यातायातलगायत दैनिक जनजीवन समेत प्रभावित हुन सक्ने भएकाले आवश्यक पूर्वतयारी अपनाउन सर्वसाधारण तथा सबै सरोकारवाला निकायहरूलाई मौसम पूर्वानुमान महाशाखाले विशेष अनुरोध गरेको छ।

हिमपात र हिमपहिरोको उच्च जोखिम: त्यता नजान पर्यटकलाई आग्रह

काठमाडौं, १३ कार्तिक । बङ्गालको खाडीमा विकसित चक्रवात 'अर्नब' तथा पश्चिमी वायुको संयुक्त प्रभावका कारण आज कार्तिक १२ गते देखि आगामी कार्तिक १४ गते (शनिबार) सम्म देशका अधिकांश स्थानमा भारी वर्षा तथा हिमपातको सम्भावना रहेको छ।   जल तथा मौसम विज्ञान विभाग, मौसम पूर्वानुमान महाशाखाका अनुसार यस अवधिमा देशका धेरैजसो स्थानमा मेघगर्जन र चट्याङ्गसहित मध्यम वर्षा तथा हिमपात हुनेछ भने विशेषगरी कोशी, मधेश, बागमती र गण्डकी प्रदेशका थोरै स्थानमा भारी वर्षा तथा एक-दुई स्थानमा अति भारी वर्षा र हिमपातको सम्भावना रहेको छ।   कृषि र जनजीवनमा पर्ने प्रभावबारे: कृषि कार्य: लुम्बिनी, कर्णाली र सुदूरपश्चिम प्रदेशका हिमाली तथा पहाडी भू-भागका थोरै स्थानमा समेत भारी वर्षा र हिमपातको सम्भावना रहेकोले धानबाली भित्र्याउने लगायतका महत्त्वपूर्ण कृषि कार्यहरू बिहीबार अगाडि नै सम्पन्न गर्न कृषकहरूलाई आग्रह गरिएको छ।   पहाडी तथा हिमाली क्षेत्रका पर्यटकहरूका लागि: उच्च पहाडी तथा हिमाली क्षेत्रमा भारी हिमपात, हिमआँधी (Blizzard) तथा हिमपहिरोको उच्च जोखिम रहेकाले सतर्कता अपनाउन अनुरोध गरिएको छ। पर्यटकहरूलाई तत्काल उच्च हिमाली भू-भागमा नजान र यदि गइसकेको भए सुरक्षित स्थानमा रहन आग्रह गरिएको छ।   दैनिक जनजीवन र यातायात: मौसममा हुने अचानकको फेरबदलका कारण चिसो बढ्न सक्ने, जोखिमयुक्त स्थान तथा सडक छेउछाउमा पहिरो जान सक्ने तथा सडक र हवाई यातायात समेत प्रभावित हुन सक्ने देखिन्छ।   यस विषम मौसमबाट हुनसक्ने सम्भावित क्षति जोगाउन आवश्यक पूर्वतयारी गर्न तथा उच्च सतर्कता अपनाउन सर्वसाधारण तथा सम्बन्धित सबै सरोकारवाला निकायहरूमा महाशाखाले जोडदार अपिल गरेको छ।

तीन दिनसम्म भारी वर्षा र हिमपातको सम्भावना: धानबाली नभित्र्याउन अनुरोध

आज अन्तर्राष्ट्रिय गरिबी निवारण दिवस, बिभिन्न कार्यक्रम गरी मनाइदैँ

स्वच्छ खाद्यन्नको महत्त्व र यसलाई जोगाउनु पर्ने आवश्यकता